booked.net
26.05.2019
13:54

Մոսկվայում կայացել է Հայրենական մեծ պատերազմում տարած հաղթանակի 74-րդ տարեդարձին նվիրված զորահանդեսը . (տեսանյութ)


Այսօր բոլոր հետխորհրդային պետություններում նշում են Հայրենական մեծ պատերազմում տարած հաղթանակի 74-րդ տարեդարձը։ Ամենախոշոր ու տպավորիչ միջոցառումը կազմակերպվել է Մոսկվայում:

Ինչպես հայտնում է gazeta.ru-ն, այս տարի զորահանդեսին մասնակցում է ավելի քան 13 600 զինծառայող, 138 միավոր՝ մեխանիզացված շարասյան կազմում և 74 թռչող սարք:

Զորահանդեսին ելույթով հանդես եկավ ՌԴ նախագահ Վլադիմիր Պուտինը:

«Շնորհավորում եմ Հաղթանակի օրվա կապակցությամբ, մեր հպարտության օրվա, հայրենիքի պաշտպաններին մեր անսահման երախտագիտության օրվա կապակցությամբ, որոնք ջախջախեցին ֆաշիզմը»,- ասել է ՌԴ նախագահը:

Այնուհետև հնչել է ՌԴ պետական օրհներգը:

Օրեր առաջ Մոսկվայի Կարմիր հրապարակում անցկացվել էր Հայրենական մեծ պատերազմում տարած հաղթանակի օրվան նվիրված զորահանդեսի առաջին գիշերային փորձը: Փորձին մասնակցել էր 35 զորահանդեսային հաշվարկ և ցամաքային տեխնիկա, այդ թվում ՝ «Յարս» միջմայրցամաքային բալիստիկ հրթիռների արձակման կայանքներ, Т-72Б3 և Т-14 «Արմատա» տանկեր, «Իսկանդեր-Մ» հրթիռային համալիրներ, «Բումերանգ» զրահամեքենա, «Կուրգանեց» մարտական մեքենաներ և այլն:

1941 թվականի հունիսի 22-ի վաղ առավոտյան ֆաշիստական Գերմանիան, խախտելով ԽՍՀՄ-ի հետ 1939թ. օգոստոսի 23-ին 10 տարի ժամկետով կնքած պայմանագիրը, առանց պատերազմ հայտարարելու՝ հարձակվեց Խորհրդային միության վրա։

Նա իր առջև խնդիր էր դրել «կայծակնային» պատերազմի միջոցով մի քանի շաբաթվա ընթացքում ոչնչացնել Կարմիր բանակը, զավթել Մոսկվան, Լենինգրադը, Կիևը և միության զգալի մասը, ստրկացնել ԽՍՀՄ ժողովուրդներին և ստեղծել մեծ կայսրություն։ Խորհրդային երկրի վրա կախվեց մահացու վտանգ։

Այնուհանդերձ՝ Խորհրդային միությունը, անցնելով միլիոնավոր կյանքեր խլած սարսափելի պատերազմի բովով, հասավ սպասված հաղթանակին, որի 74-րդ տարեդարձը նշվում է այսօր՝ մայիսի 9-ին:

Պատերազմն սկսվելու հենց առաջին իսկ օրվանից հայ ժողովուրդը Խորհրդային միության բոլոր ժողովուրդների հետ մի մարդու պես ոտքի կանգնեց՝ պաշտպանելու իր հայրենիքը։

Պատերազմը սկսվելու պահին Կարմիր բանակի շարքերում ծառայում էր շուրջ 60.000 հայ։ 1941թ. հունիսի 23-ից հանրապետությունում սկսված զանգվածային զորահավաքի, ապա ամենամյա զորակոչի հետևանքով Խորհրդային Հայաստանից բանակ մեկնեց ավելի քան 300.000, իսկ ԽՍՀՄ մյուս հանրապետություններից՝ ևս ավելի քան 200.000 հայ։ Իսկ շուրջ 100.000 հայեր պատերազմին մասնակցեցին ԽՍՀՄ դաշնակից երկրների բանակների և ֆաշիստական Գերմանիայի կողմից զավթված երկրների դիմադրական ու պարտիզանական շարժման շարքերում։ Պատերազմի ընթացքում ռազմաճակատներում զոհվեց ավելի քան 200.000 հայ զինվոր։

tert.am

Գտեք մեզ Facebook-ում

Գտեք մեզ Twitter-ում